Назад к списку
Мэнэ-Алданна «Сыыс-шоу» ыытылынна

                  Саха Өрөспүүбүлүкэтигэр нэһилиэнньэ дьарыктаах буолуутугар, Томпо оройуонугар олохтоох бородууксуйаны оҥорон таһаарааччылары өйөөһүн сылларынан Е.П. Неймохов аатынан Мэҥэ-Алдан орто оскуолатын иһинэн үлэлиир «Аргыс» оҕо үлэ сынньалаҥ лааҕырыгар «Сыыс-шоу» диэн бэрт интэриэһинэй тэрээһин буолла.________________________________________ 

                  Мэҥэ Алдаҥҥа 40-тан тахса сыл устата үлэлээбит «Аргыс» оҕо сайыҥҥы лааҕырыгар элбэх оҕо үлэнэн иитиллэн тахсыбыта. Оскуола агро хайысхалаах буолан үлэни инники күөҥҥэ тутар. Мэҥэ Алдан нэһилиэгэр Мыытаах диэн сиргэ от ыйын 19 күнүгэр хаппыыста сыыһын ыраастааһыныгар улэ лааҕырдарын региональнай слета ыытылынна. Күрэххэ оскуола оҕолоро саастарынан үс бөлөххө арахсан, ону тэҥэ ыччат уонна бэтэрээннэр күүстээх хамаандалары туруордулар. Мэҥэ Хаҥалас Томтор нэһилиэгиттэн «Сайдыс», Кириэс Халдьаайы нэһилиэгиттэн «Байаҕантай кэскилэ» оҕо үлэ-сынньалаҥ лааҕырдарын, Хаандыга, Мэҥэ Алдан орто оскуолатын уонна устудьуоннар тутар этэрээттэрин хамаандалара кытыннылар. 

                 Кыттааччылар хамаанданан арахсан хаппыыста сиригэр 80 хаамыылаах биирдии эрээккэ тигистилэр. Старт бэриллибитин кэннэ сыыһы үргээн бурҕаҥната турдулар. Күрэхтэһии сүрүн ирдэбилинэн сыыс түргэнник уонна хаачыстыбалаахтык ыраастаммыт буолуохтаах. Онон быраабыланы толорор сыаллаах, бэрт кичэллээхтик уонна түргэнник сыыстаатылар. Хамаанданан киирсиигэ оскуола оҕолоро, биллэн турар, күн аайы үлэлии сылдьар, сэнэх дьон буолан, тэҥнээхтэрин булбатылар. Бастакы кыттааччылар номнуо 20-чэ мүнүүтэнэн бүтэрдилэр. Босхоломмут киһи тута хамаандатын дьонугар көмөлөһө ыстанар. Тиритиилээх-хорутуулаах күрэхтэһии олус интэриэһинэйдик, бэрт түргэнник түмүктэннэ. 

                   Оскуола оҕолоро, ыччат, бэтэрээннэр хамаандалара тус-туһунан бөлөххө арахсан I, II, III бочуоттаах миэстэлэргэ тиксэн анал кубогынан, сыаналаах бириистэринэн наҕараадаланнылар. Ону тэҥэ биирдиилээн кыттааччыларга 22 анал ааты иҥэрдилэр. Хамаанданан күрэхтэһиигэ «Саамай ыраас территория» кыайыылааҕынан Мэнэ Хаҥалас хамаандата, «Саамай түмсүүлээх хамаанда» Кириэс Халдьаайы, «Саамай түргэн хамаанда» бэтэрээннэр, «Саамай үлэһит хамаанда» устудьуоннар буоллулар. Мэҥэ Алдан орто оскуолатын хамаандата Кылаан кыайыылааҕынан таҕыста. 

                   Үлэни уонна сынньалаҥы дьүөрэлии тутар дьон сыыс ыраастааһынынан бүппэтилэр. Эбиэт кэннэ үлэ-сынньалаҥ лааҕырдарын ыраахтан-чугастан мустубут ыалдьыттара бэйэлэрин билиһиннэрдилэр. Иккис түһүмэххэ «Үлэ киһини киэргэтэр» бырайыагы көмүскээһиҥҥэ лааҕырдар хаһан, хайдах төрүттэммиттэрин, өр сылларга үлээбит дьону кэпсээтилэр. 

                   Үһүс түһүмэххэ кыттааччылар көрөөччүлэргэ оонньуу тэрийдилэр.Аныгы үҥкүү куонкуруһа ыытылынна. Биирдиилээн, пааранан уонна бөлөҕүнэн кытыннылар. 

                   Киһи үлэлээн аһын булунар. Үлэни уонна көрү дьүөрэлии тутан, өссө күрэҕи киллэрэн «Сыыс-шоу» тэрээһин дьон биһирэбилин ылла. Быйыл 7-с төгүлүн ыытылынна. Слету өр сылларга лааҕыр үлэтин салайбыт Татьяна Ордаховауонна оройуон дьокутаата, үөрэҕирии салаатын иитэр үлэҕэ начаалынньыга Елена Винокурова тэрийдилэр.